ફરી પધારશો ગાંધી?

અંગ્રેજી હકુમતને તો તમે એકલાય કાઢશો ગાંધી.

પણ આઝાદ ભારતને ઓછા પડશે પાંચસો ગાંધી*.

કોથળામાં પૂરીને લાવ્યા'તા એક વખત સંસદમાં**

પાંચનીમાંને  હજારનીમાં, કહ્યું'તું ન છાપશો ગાંધી.

દર બીજી ઓકટોબરેને ત્રીસ જાન્યુઆરીએ ચારેકોર 

શાંતિને અહિંસાનો ઓચિંતો જુવાળ ભાળશો ગાંધી. 

છેલ્લી પ્રાર્થનામાં મોડા પડ્યાનો રહી ગયો વસવસો

નહીં તો પાબંદ હતો કેડે બાંધેલી ઘડિયાળશો ગાંધી.***

હવે તો થાકયો છે તમારા બહુરુપીયાઓથી 'અમિત' 

ટોપીની નહિ તમારી જરૂર છે, ફરી પધારશો ગાંધી?

*સંદર્ભ: ૩૦ જાન્યુઆરી ૨૦૧૨ ના દિવસે કલકત્તાના ૫૦૦ થી વધુ બાળકોએ ગાંધીનો વેશ કાઢીને વિશ્વ વિક્રમ સર્જ્યો.

**સંદર્ભ: ૨૨ જુલાઈ ૨૦૦૮ મા no confidence vote વખતે કોથળામાં લાવેલી હજારની નોટો દર્શાવીને યુપીએ સરકાર પર રૂપિયાથી સંસદ સભ્યો ના મત ખરીદવાનો આરોપ મુકાયેલો.

***સંદર્ભ: ગાંધીજી પાંચ વાગ્યાની પ્રાર્થનામાં તે દિવસે મોડા પહોંચેલા એટલે કદાચ દશ મિનીટ વધુ જીવ્યા. સમય પર પહોંચવાના એ ખુબ આગ્રહી હતા અને એ દિવસે મોડા પડ્યાનું એમને દુખ પણ હતું. એમની હમેશની સાથી અને પોતડીએ બાંધેલી ઘડિયાળ એમની હત્યા સમયે તૂટી ગઈ અને એમના મૃત્યુનો સમય એમાં હંમેશ માટે અંકાઈ ગયો.