પતંગ

ઉત્તરાયણ છે, ભરઆકાશે અભરખાભેર ઉડે પતંગ

દોરીના છેડે છે માણસ, અંદરોઅંદર ન લડે પતંગ? 

એને ચિંતા નથી કપાવાની સરખેસરખના પેચમાં

છળકપટના લટપટીયાને લંગસીયાથી ફફડે પતંગ.

કપાઈ ગયો છેલ્લો પતંગ એ ગરીબ બાળનો ભલેને

ઝરડું લઇને ફરી પડે રસ્તે, નવેસરથી પકડે પતંગ.

તમારો હો દિવસ ત્યારે ઉડી લો ઉડાય એટલું ઉંચે

બીજે દિવસે તો રસ્તા વચ્ચે રઝળતા જડે પતંગ.

એકલી તને જ સાલે છે ખોટ એવું થોડું છે 'અમિત'?

ત્રણ વરસથી પડ્યા પડ્યા મારા માળીયે રડે પતંગ.